تـــــــــــــــــــــــــــــــــــــــــــــــــاج

بناتى عابرة السبيل وايناس

بعتولى تاج
وطبعا من حبهم ماقدرش ارفض لهم طلب
وهاجاوب على التاج
ونبدأ بسم الله وبعد الصلاة والسلام على رسول الله

انت مين بقا
انا اسعد تيتا فى الدنيا بمصطفى اول حفيد ليا

عندك كام سنه
51 سنه

هل انت متزوجة ؟ وهل عندك اولاد؟
انا ارمله وعندى بنتين واحده متزوجه وعندها مصطفى والاخرى ربنا يكملها على خير

دراستك ايه؟
بكالوريوس علوم وتربيه

كم طولك...وما لونك..؟
طولى168 .... ولونى ابيض فضى هههههههههههه

هل تمارسين عملا بشهادتك ام عمل حر وماهو ؟
الحمد لله اعمل فى مجال دراستى ولكنى اصبحت اداريه((وكيلة مدرسه ))

ماهى مدة عملك اليوميه ؟
لو هتحسبيها هتطلع من 8 الصبح الى 2 الظهر

ماذا تفعلين بوقت فراغك ؟
ياه بعمل حاجات كتير
بصلى بضمير...اقرأ قرءان واحاول اتعلم تجويد بالمجهود الشخصى
اتفرج على التلفزيون....اقعد ارد على المدونات اللى بتعجبنى مواضيعها

هل لديك هوايات....وهل تمارسينها ؟
الحمد لله عندى هوايات واهمها القراءه...ولكنى لم اعد امارسها لضعف النظر والصحه

هل تشعرين برضا ربنا عنك ؟
الله وحده اللي يعلم رضاه عني... ولكنى اطبق الكلام اللى بيقول ((انظر الى منزلة ربنا فى قلبك....فترى منزلتك عنده))
والحمد لله ربنا اهم مايهمنى فى الدنيا

هل تحبي؟...ومن بقلبك الان؟
طبعا بحب بكل ذره فى قلبى...بحب حفيدى الاول
وبحب بناتى الاتنين
وبحب زوجى الله يرحمه
وبحب جوز بنتى وخطيب بنتى
وبحب كل الناس الطيبه

لو لم تجدي من تحبي ....فماذا ستفعلين ؟؟
بكون زعلانه وحزينه لما ازعل من حد
وعلشان كدا بحب كل من هو طيب وحنين

عندما تكونين فى موقف اتخاذ القرار..تخالفين الجماعه.. ام تشركين معك الاخرين ؟
طبعا بشرك الاخرين

هل تتعاملين بواقعيه؟
بتمنى ذلك ولو على نفسى
ولكن الاخرين بيجننونى لما يعملوا حاجات لا تمت للواقعيه من قريب او بعيد

ماهو الشيء الذى فعلته وندمت عليه طول عمرك ؟
ان الله يغفر الذنوب جميعا
وان كان التقصير فى قراءة القرءان

هل تصارحين غيرك بالحقيقه ؟ ام تقولين له مايريد سماعه؟
الغالب بقول للي قدامي اللى عايز يسمعه
بس لما اللى قدامى بيكون زيى بقوله الحقيقه وانا عارفه انه مش هايزعل

صف انسان يمكن ان تحبيه عمرك كله ؟
انسان حنين قوى وطيب قوى ومؤمن قوى
وعاقل وزكى

متى يقسوقلبك ؟
مابعرفش اقسى اكتر من دقيقتين وارجع تانى
ودا لما حد بيزعلنى ومايعرفش يقدرنى صح

من هو اول من قلت له احبك؟
بطه صاحبتى وبنت الجيران وكنت فى اولى ابتدائى واول من بكيت عليها لما اتخاصمنا سوى

وبالنسبه للجنس الاخر...خالى(ربنا يديله الصحه))ومن المضحكات انى كنت عايزه اتجوزه... وقالولى نقطع ودانكم انتم الاتنين... بس انا رفضت التضحيه بودانى وضحيت باول حبيب هههههههههههههه

هل يمكن ان تحبي احد من المدونين؟
السؤال ده ليس له موقع من الاعراب بالنسبالى ...كبرنا على كدا بقا
وان كنت احب الجميع هنا كاخواتى وابنائى


وهل يمكن ان يكون شريك حياتك؟
شريك حياتى هو ابو بناتى الله يرحمه ويجمعنا على خير سوى فى الجنه ان شاء الله

ماذا تعنى لك المرأة او الرجل؟
المرأة الحنان والدفيء والصديق
الرجل رفيق الحياه والرعايه والحب برضه

فى زمن البحث عن الماده ..عن ماذا تبحث انت ؟
نفسى ماشيلش مسؤليه اينما كانت او ماكانت

متى تعرفي انك تحبي ؟
زمان يعنى
عرفت انى بحب زوجى الله يرحمه واحنا مخطوبين
لما اتمنيت ان يجمعنا مكان واحد بلا خوف من المسؤوليه

ماهى الشخصيه التى اثرت بحياتك ؟
كتير طبعا...لان مجالات الحياه كتيره
امى فى العباده والايمان
واستاذى فى العلوم فى ابتدائى
واستاذى فى اللغه العربيه فى ثانوى
وابو بكر الصديق رضى الله عنه فى الطيبه والحنان
واى حد كافح علشان ينجح فى الحياه

هل يوجد من ترينه سعيدا فى الدنيا ولماذا ؟
السعيد هو من يرضا بقضاء الله مهما حصل
والحمد لله راضيين ولكن هذا لايمنع الحزن اللى ساكن فى القلب

ماهى درجة صراحتك ؟
معاكو هنا صريحه 100%
وفى الحياه عموما بحاول اوصل لنفس النسبه وان كانت المجاملات بتخلى درجة صراحتى 95 %

وماهى المواقف التى يمكن ان تكذبي فيها ؟
بكذب لما بكون بصلح بين اتنين
او لما بكون تعبانه ومش عايزه اكلم حد

هل يتغير الحب بعد الزواج؟
المفروض انه يزيد لان مابقاش هناك حواجز تمنعنى عن من احب
واجمل حاجه ان الزواج بيتحول لعشره والفه وموده من نوع خاص جدا لشخصين فقط

فيما تفكري الان ؟
بفكر انى اجاوب بصراحه شديده جدا

لو لم تعيشي بمدينتك؟؟؟فاى مدينه اخرى تفضينلها ؟
والله فكرت كتير اغير مدينة القاهره
ولكن الظروف تمنعنى..والصحه والعمل والاستقرار وهكذا يعنى
ولكنى كنت اتمنى ان اكون بمدينة الحبيب صلى الله عليه وسلم

من اول من ياتى ببالك لتحكى له اسرارك؟
بناتى طبعا

من هو الد اعدائك؟
الغباء

من هو صديقك؟
المؤمن بالله حق الايمان
اللى بيجى على نفسه علشان يرضى ربنا
الحنين الطيب..اللى بيخدم غيره لوجه الله

لو الدنيا كلها زيك....لمن تقول هذه العباره ؟
عمر ابن الخطاب وعمر ابن عبد العزيز رضى الله عنهما
لان الدنيا ناقصها العدل بين الناس والظلم كتر قوى
ولكن طبعا كل دا بقدر الله ولا حول ولا قوة الا بالله

ماذا تكره فى الحياه ؟
القسوه اللى بقت فى القلوب

ماذا تحب ؟
الحمد لله ان ربنا رزقنا القرءان ((اللهم اجعل القرءان ربيع قلبى ونور صدرى وزهاب همى ))
متهيئلى هو النعمه الوحيده وطبعا الاذكار والصلاة على رسول الله صلى الله عليه وسلم
لان كل شيء غيرهم فانى

كيف تواجه مايضايقك وماذا تفعل عند المفاجآت ؟
بتعب قوى..واتوجه الى الله بالدعاء((لا اله الا انت سبحانك انى كنت من الظالمين ))
لو مفاجأة حلوة بفرح لانى نفسى افرح زى الاطفال
لانى نسيت الفرح


لو معاك فلوس اكثر مما تتخيل...فماذا ستفعل بها ؟
كل واحد وخياله بقا
يعنى اول شيء هاشكر ربنا واطلع زكاتهم
ثانيا هاجيب لولادى وازواجهم شقق محترمه
نفسى الم كل المسا كين والفقراء فى بيت يجوا ياكلوا ويلبسوا من غير مَن احد عليهم ولا متاجره بفقرهم
اعمل مشروع تعليمى ايمانى تربوى لمن يرضى بشروطى التربويه جدا

هل الفقر يصنع حبا؟؟
الحب موجود تحت اى ظروف
ولكنه سوف يموت مع الفقر

وماذا لو وجد الحب فى زمن الفقر المادى؟
الاجابه واضحه...سوف يموت ويتعذب الحبيبن لان الخبز قبل الحب دائما

ماهى اقسى صدمه تعرضت لها حتى وقتنا هذا؟
وفاة زوجى الله يرحمه...ثم الوحده الروحيه اللى انا عايشه فيها حتى الان

كان رد فعلك؟
عشت مع ربنا فى قرءانه العظيم وقفلت على روحى
لان ماحدش بيستحمل حزن الاخرين

هل تعلمتى منها شىء؟
اتعلمت ان الدنيا ملهاش امان
وان الاخرة هى خير وابقى

هل انت على استعداد لتلقى صدمات اخرى؟؟
ربنا يكفينى شر الصدمات مايوجعش قلبى على حبيب

كيف ترد على من لاتصدقه ؟
ولا كانى سمعت حاجه
وهعمل نفسى عبيطه

اذا احببت انسان ما ...هل تصرح له بحبك ؟
لو هايفهم انى بحبه فى الله ..اه هاقوله
بس دا عادة بيحصل قليل جدا
لانى ندمت كتير على حب ناس ماطلعوش على مستوى الايمان اللى يرضى ربنا

ماذا ا تفعل لو لم يتجاوب معك؟
ولا حاجه...لانه حب فى الله
لم ولن انتظر منه اى عائد الا رضا ربنا

هل تؤمن بالمثل القائل:انا احب فانا اعيش ؟
اه ...لان الحب هو وقود الحياة...وزى مانتو عارفين مصطفى ربطنى بالحياة تانى

ماهى القضايا التى تشغل بالك؟
كتير منها ماهو شخصى ومنها ماهو وطنى
الشخصى انى خايفه من ضعف الايمان
والثانى والتالت والرابع
ليه حكومتنا ماتشفش اللى يرضى ربنا وتعمله
ليه ناسيين الاخره

هل تستطيع تحقيق كل احلامك؟
احلامى بسيطه..وهى انى استطيع ارضاء ربنا بالقول والعمل ((ربنا يقدرنى على تحقيقها))
واموت منغير ماتعب حد معايا

هل تمتلك طموحا...وماهو؟
طموحى بقا عند بناتى
انى اشوف بناتى وازواجهم احسن ناس فى الدنيا لانى بعتبر نجاحهم نجاحى وسعادتى فى سعادتهم

كيف ستحقق طموحك...ام سيبقى حلما فقط!!!!!!!!!!!!!!
إن شاء الله بحاول أحققه بانى ازرع جوا بناتى الرغبه فى النجاح والتفوق وهما بقا يقفوا مع ازواجهم حتى يكون وراء كل رجل عظيم امرأه اعظم منه طبعا

ماهى علاقتك بالدنيا؟
ربنا بيقول ((وخلقنا الانسان فى كبد ))صدق الله العظيم
الدنيا بالنسبالى كفاح للوصول للجنه

لو لك اختيار زمن تعيش به....فماهوذلك الزمن ؟ ولماذا ؟
اللى اختارهولى ربنا ..اكيد دا الافضل ليا

هل يمكن ان ارا ك وانت غائب؟؟؟؟؟؟؟
طبعا ..لانى صريحه لدرجة ان اى حد ممكن يتخيلنى بعد كل الكلام دا عنى

ويعرف انا بعمل ايه فى كل دقيقه فى حياتى

ماذا ترى فى نفسك مميزا عن الاخرين؟
كل ماقول انى كويسه فى( شيء ما )واحسن من ناس كتير
الاقى كتير احسن منى فيها
والعظمه لله وحده

من اذا اقترب منك ...هربت منه بعيدا؟
المنافق...المخادع...الاستغلالى

من تقول له : قرب منى قرب ...ياقلبى يا متغرب ؟

اختى الله يرحمها

ماذا تريد ان تقوم به قبل ان تموت؟
ماخليش حد زعلان منى ولو على حساب نفسى
ولو ان دا صعب جدا
لان الناس بتزعل لوحدها من لا شيء

اهداء التاج ؟؟؟؟؟؟؟؟؟
كل انسان اجتماعى بيحب الناس ويحب انهم يعرفوه..ويمكن يكون عنده هدف فى المعرفه دى
ويقدم قدوه حسنه للاأخرين


ملحوظة
اشكر كل من اهدانى التاج وارجوا وان اكون قد افدتهم باجابتى
وارضيت دافع المعرفه لديهم
وشكرا

الاستغـــفـــــــــــــــــــــــــــــــــــــــــــــــار

بسم الله الرحمن الرحيم
وبه نستعين

انا كنت عند اخى اكيد اقرأ له اخر موضوعاته
ووجدته يتمنى ان ننشرها على قد مانستطيع
وها انا اوفى بوعدى له ...كما قلت له عند تعليقى عنده
اللهم اجعلها فى ميزان حسناته

دعوة الى ( حملة الاستغفار ) لرفع البلاء عن امة محمد صلى الله عليه وسلم وزيادة رزقها و اقواتها

هل تريد تكفير السيئات وزيادة الحسنات ورفع الدرجات ؟
هل تريد الذرية الطيبة والولد الصالح والمال الحلال والرزق الواسع ؟
هل تتمنى راحة البال، وطمأنينة القلب ؟
هل تريد صحة البدن والسلامة من العاهات والأمراض ؟
هل تريد ذهاب الغم و الهم ؟

أنه طاعة لله عز وجل

أنه سبب لمغفرة الذنوب: فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّاراًا
نزول الأمطار: يُرْسِلِ السَّمَاء عَلَيْكُم مِّدْرَاراً
الإمداد بالأموال والبنين: وَيُمْدِدْكُمْ بِأَمْوَالٍ وَبَنِينَ
دخول الجنات :وَيَجْعَل لَّكُمْ جَنَّاتٍ
زيادة القوة بكل معانيها :وَيَزِدْكُمْ قُوَّةً إِلَى قُوَّتِكُمْ
المتاع الحسن :يُمَتِّعْكُم مَّتَاعاً حَسَناً
دفع البلاء :وَمَا كَانَ اللّهُ مُعَذِّبَهُمْ وَهُمْ يَسْتَغْفِرُونَ
وهو سبب لايتاء كل ذي فضل فضله: وَيُؤْتِ كُلَّ ذِي فَضْلٍ فَضْلَهُ
العباد أحوج ما يكونون إلى الاستغفار، لأنهم يخطئون بالليل والنهار، فاذا استغفروا الله غفر الله لهم.
الاستغفار سبب لنزول الرحمة: لَوْلَا تَسْتَغْفِرُونَ اللَّهَ لَعَلَّكُمْ تُرْحَمُونَ

لا شك أن الاستغفار مأمور به لقول الله: وَاسْتَغْفِرُوا اللَّهَ
ولا يلزم أن يكون من معصية، فقد يستغفر الإنسان عن أشياء فعلها قديماً، ثم إن الإنسان قد يخطئ وهو غير منتبه أنه قد أخطأ، وقد يذنب وهو غير

قال الرسول صلى الله عليه وسلم
من لزم الاستغفار جعل الله له من كل هم فرجا، ومن
كل ضيق مخرجا، ورزقه من حيث لا يحتسب

قصـة واقعيـة عن الاستغفار :

هناك امرأة قالت:

ما ت زوجي وأنا في الثلاثين من عمري

وعندي منه خمسة أطفال بنين وبنات ، فأظلمت الدنيا في عيني

وبكيت حتى خفت على بصري

وندبت حظي ..ويئست ..وطوقني الهم

فأبنائي صغار وليس لنا دخل يكفينا

وكنت أصرف باقتصاد من بقايا مال قليل تركه لنا أبونا

وبينما أنا في غرفتي

فتحت المذياع على إذاعة القران الكريم

وإذا بشيخ يقول : قال رسول الله صلى الله عليه وسلم

(( من أكثر من الإستغفار جعل الله له من كل هم مخرجا ومن كل ضيق فرجا ))

فأكثرت بعدها الإستغفار

وأمرت أبنائي بذلك

وما مر بنا والله سته اشهر

حتى جاء تخطيط مشروع

على أملاك لنا قديمه

فعوضت فيها بملايين

وصار أبني الأول على طلاب منطقته

وحفظ القران كاملاً

وصار محل عناية الناس ورعايتهم

وأمتلأ بيتنا خيراً

وصرنا في عيشه هنيئه

وأصلح الله لي كل أبنائي وبناتي

وذهب عني الهم والحزن والغم

وصرت أسعد أمرأه
منقول للشيخ عائض القرني

نعم إنها أعجوبة الاستغفار التي غفلنا عنها

يقول أحد الأزواج ::

كلما أغلظت على زوجتى أو تشاجرت أنا وهي أو صار بيني وبينها أي مشكلة أهم بالخروج من

البيت من الغضب ....... ووالله لا أفارق باب العمارة إلا وتجتاحني رغبة شديدة في الذهاب للإعتذار منها

ومراضاتها............أخبرتها بذلك فقالت لي: أتعرف لماذا ؟؟

قال لها : ولماذا ؟

قالت بمجرد أن تخرج من الغرفة بعد شجارنا ألهج بالاستغفار ولا أزال أستغفر حتى تأتي وتراضيني

نعم أخي انه الاستغفار الذي قال عز وجل عنه (( وما كان الله معذبهم وهم يستغفرون ))

ألا يستحق أن يكون أعجوبة

فكيف يكون هذا الكنز فى ايدينا و نتركه و الله إن تركناه نكون نحن الخاسرين

ففي حديث أبى سعيد الخدرى رضي الله عنه أن رسول الله قال: "إن الشيطان قال: وعزتك يا رب لا أبرح أغوي عبادك ما دامت أرواحهم في أجسادهم, فقال الرب تبارك وتعالى: وعزتي وجلالي لا أزال أغفر لهم ما استغفروني"، أخرجه أحمد وأبو يعلى والحاكم وقال صحيح الأسناد

أخرج ابن ماجة عن أبى هريرة قال: قال رسول الله صلى الله عليه وسلم: "إني لأستغفر الله وأتوب إليه في اليوم مائة مرة". قال الهيثمى حديث أبى هريرة صحيح ورجاله ثقات. وفى رواية أحمد والنسائى والطبرانى بلفظ "...فى كل يوم مائة مرة".

وقال عز وجل قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لاَ تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ

صيغالاستغفار
1 - سيد الاستغفار وهو أفضلها، وهو أن يقول العبد: اللهم أنت ربي لا إله الا أنت، خلقتني وأنا عبدك وأنا على عهدك ووعدك ما استطعت، أعوذ بك من شر ما صنعت، أبوء لك بنعمتك عليّ وأبوء بذنبي، فاغفر لي، فإنه لا يغفر الذنوب إلا أنت .
2 - أستغفر الله.
3 - رب اغفر لي.
4 - اللهم إني ظلمت نفسي فاغفر لي، فإنه لا يغفر الذنوب إلا أنت.
5 - رب اغفر لي وتب عليّ إنك أنت التواب الغفور، أو التواب الرحيم .
6 - اللهم إني ظلمت نفسي ظلماً كثيراً ولا يغفر الذنوب إلا الله، فاغفر لي مغفرةً من عندك، وارحمني إنك أنت الغفور الرحيم .
7 - أستغفر الله الذي لا إله إلا هو الحي القيوم وأتوب إليه .

وكان عليه الصلاة والسلام ينوع في طلب المغفرة، ويعدد الذنوب بأنواعها، فيقول:
اللهم اغفر لي خطيئتي وجهلي وإسرافي في أمري، وما أنت أعلم به مني، اللهم اغفر لي جدي وهزلي، وخطئي وعمدي، وكل ذلك عندي، اللهم اغفر لي ما قدمت وما أخرت، وما أسررت وما أعلنت، وما أنت أعلم به مني، أنت المقدم وأنت المؤخر وأنت على كل شيء قدير

فهده دعوه لبدء ( حملة الاستغفار ) التى يجب ان ننشرها بكل قوتنا و ننوه عنها فى كل مكان حتى يرفع الله عنا البلاء و يزيد من ارزاقنا

فأدعوا جميع المدونين و المدونات و أستحلفهم بالله ان ينشروها فى جميع مدوناتهم عسى الله أن يستعملنا فى رفع هذا البلاء عن الأمه جميعاً

يا ليــــــــت قلـــــــــــبى يطمئـــــــــــــن

شجعنى على الكتابه النهارده حاجه مهمه قوى وهى الحب

الحب دا شيء متعب جدا وخصوصا لما يكون حب مسئول

وعلشان ماطولش والموضوع يضيع من دماغى

اولا ::
انا سمعت خبر وفاة الدكتور مصطفى محمود...الله يرحمه
وهذا الرجل كنت احبه علما وثقافه وادب واحترام وترفع عن الدنايا
هذا الرجل تفتحت عيناى على موسيقى برنامجه الشهير ((العلم والايمان ))
هذا الرجل الذى يمثل مواقف للرجوله تماثل موقف الله يرحمه الشيخ متولى الشعراوى
فكلاهما قله من الرجال الكبار العظماء الذين رفعهم العلم والايمان
ولم ينتظروا رفعة مركز ولا قرب من رئيس ولا وزير
رحم الله شرفاء ذلك الوطن الجريح


ثانيا
انا عرفت انا ليه بشتكى من بنتى التى لا تذاكر ومازالت والله
فجأه كدا نورت فى عقلى لمبه ..ولقيت عنوان كبير داخل عقلى
فقرأته
فاذا هو:....
انك تحبى هذه البنت بجنون

طفيت اللمبه وخرجت ابحث عن معنى هذا الكلام
وهى اصلا مش طيقانى ..كل ماجبلها سيرة المذاكره الاقيها قالت:...طيب والله مش مكلماكى طول النهار
المهم فكرت كتير هو ايه الحكايه
ازاى اكون بحبها بجنون وهى فى نفس الوقت مخصمانى علطول

ووجدت المشكله ...ولكنى لم اجد الحل
المشكله هو انى تعبت جدا والحمد لله هو تعب محمود واشكر فضل ربنا عليه
تعبت يا رب من شيل المسئوليه
تعبت من تحمل مسئولية البيت والاولاد
تعبت من عيشه انا فيها راجل وست فى نفس الوقت
تعبت وانا موقف يحطنى فى جو بارد مريح للاعصاب
وفجأه اجد نفسى اعانى من حرارة شديده يرتجف فيها عقلى وجسمى من السهر والحمى

ايام كتيره وسنين عدت
شفت فيها الفرح ايام نجاحهم وتفوقهم
وشفت فيها الدموع بحور عند تعبهم او حزنهم من صديقه او زميله
وشفت فيها الخوف والرعب من مرض الم بهم او خوف من امتحان
شفت فيهم السعاده فى العيد وهما لابسين ملابس العيد االجديده واللى اشترتهلم بايدى...وفرحانين بلعب العيد واللعب مع ولاد الجيران
شفت فيها بهجة بدايات السنه الجديده وانا بشترليهم الشنطه الجديده ....والجزمه الجديده...وادوات المدرسه.. زى المسطره والقلم والاستيكه والمقلمه الملونه

حقيقى عشت معاهم اجمل سنوات العمر
بحب وصبر
وكنت بمنى نفسى مع كل سنه تعدى ان مشوار الحياه قارب على نهايته
ان قطار الحياة قارب على الوصول لمحطته الاخيره
ليستريح من طول الرحله
وعندما تزوجت بنتى الاولى كانت بداية التفكير فى نهاية الرحله
وعندما جاء مصطفى للدنيا كان هذا الحدث السعيد هو قمة الامل والفرحه بان القلب المتعب ..خلاص فعلا محتاج للراحه والسعاده

ولكن هيهات ان يتحقق كل مانتمناه
فهاهى بنتى الثانيه لا تزال تحتاج ليد قويه وعين ساهره..وقلبا مستيقظا
تحتاج ليد قويه تخدمها
وعين ساهره تفكر فى مستقبلها
وقلبا يقظا يتمنى نجاحها

انى احبها ....احبها... احبها
ولكنى اخاف من حزنها....واخاف من دموعها لو لم تاتى بنفس تقدير السنين الماضيه
انى اتمنى ان ارى فرحتها بالنجاح زى كل سنه
ولكنى لا ارى نفس المذاكره ولا الجهاد والكفاح والتعب والسهر زى كل سنه
بل ارى الوقت يمر من بين اصابعها وهى لا تشعر بانى احترق بمرور الوقت

وهنا المشكله:...........
اجد نفسى ولسانى لا يسكت عن توجيهها للمذاكره فى كل ساعه......وطبعا هى لاتفعل بل تغضب منى ايضا
وذلك يدعونى للغضب وللضغط العالى وزيادة مستوى السكر
وانسى انى ام....ولا اتذكر غير انى مسئوله عن مستقبلها وبس
فماذا افعل؟......

لا اجد نفسى الا وانا مريضه حزينه واشكوا الى الله حالى
فهل سا اظل هكذا افعل ما لا يريح نفسى واتصرف كانى بقلب رجل لاينحنى امام مجريات الامور
ولكنى
اتمنى ان اسعدها
اتمنى ان آخذها بحضنى فى امان وسعاده
اتمنى ان اعطيها حبى وحنانى
اتمنى الا افكر فى اى شيء الاان اكون مصدر الحب والفرح لها

ولكنى مازلت اتحمل المسئوليه
ولا استطيع التخلى عن مسؤليتى
((فكلكم راع وكلكم مسئول عن رعيته ))

وستظل هناك مشكله
حتى يطمئن قلبى .........ويا ليته يطمئن
!!!!!!!!!!!!!!!!!!!!!!!!!!!!!!!!

عندما يكون العقل متوقف
ويكون القلب نائم لايشعر
وتكون الدنيا هادييييييييييييييييييييييييييييييييييييييييه من حولك
لاتسمع ولاتنظر اى شيء


ياترى دا ملل
ولا زهق
ولا موت مؤقت
ولا حزن

انى لا اعرف اى شيء
انى اصحى وانام
انى ااكل والعب على الكمبيوتر
انى اتكلم ولكنى انفذ الكلام اكتر

ماهذا الذى انا فيه؟

ربنا يخلى حبايبكم

انا كنت عند مصطفى آ آ آ آ آ
ولعبت معاه...واجمل حاجه فيه
لما باباه يلعب معاه بجد بيموتنا من الضحك على برائته
يادوبك باباه يخبى وشه ويروح بصصله فجأه ودا هاتك يا ضحك
بجد انا بفرح قوى بلعب باباه معاه
لان بنتى مش بتعرف تضحكه زيه خالص
انتوا عارفين الموضوع عامل كدا زى شركه
ماما للاكل ...وبابا للعلاقات العامه
ربنا يخليهم لبعض

الاجمل بقا كمان انهم جايين تانى يوم الاتنين
وبما ان دكتورتنا مريضه
وملازمه للفراش
فانا استبشرت خيرا بقدوم مصطفى
لان ماحدش هايعرف يخليها تقوم من السرير وتتحرك الا الواد مصطفى العثل ده

يجوا بالسلامه
والدكتوره تقوم بالسلامه
وانا بقى من غير ماوجع دماغكم اكتر مكن كدا
ااقولكم هامشى بالسلامه
هاتوحشونى
الى اللقاء

هى الحياه لابد من العوده اليها

وحشتونى....ومش معنى انى مابكتبش انى نسيتكم
ابد ا ابدا بس مشاغل والله كنت مأجلاها لبعد العيد

هى الحياه لابد من العوده اليها


خلاص فقت من اللى ورايا...او بالاصح اجلت مايمكن تأجيله
فمثلا ورايا انى اشترى قماش الستاير وقماش التنجيد للعروسه
بس اجلته لما الجو يطرى شويه لانى مش بستحمل الحر والشمس


ورايا تنجيد الانتريه فى بيتى...وبرضه اجلته لبعد جواز العروسه لانها هى الاهم

واهم ماورائى بقى ودا اهم شيء فى حياتى دلوقتى
العروسه نفسها
بجد انا احترت فى امرها
امتحانها قرب...وهى ولا هنا
مش فاضيه غير انها تعيش حياتها...كوره... وكمبيوتر..وتلفزيون
طيب والمزاكره يابنتى...تغضب منى وتخاصمنى...

ااقول لخطيبها يابنى كلمها قلها...فهمها...فوقها لمصلحتها
هو كمان يضحك ويقولى اكيد هى عارفه مصلحتها
دى يا طنط فى اخر سنه وهى مش صغيره
اتجنن انا بقا ولا ماتجننش

يعنى اعمل ايه بس ياربى
طول رمضان وانا بدعيلها...ان ربنا يهديها لنفسها ويصلح حالها
قولوا معايا امين يارب العالمين

بجد تعبت يا اخواتى وماكنتش عايزه اوجع دماغكم
بس الوضع على ماهو عليه من شهرين لغاية دلوقتى
فقلت مافيش بقى غير انى اكتب مانا فيه
لانى كنت بنتظر ان الوضع يتغير ...لكن مافيش فايده
ولقيت انكم وحشتونى قوى ونفسى اكلمكم

تخيلوا انى حرمت نفسى من مصطفى ومامته علشانها
وبرضه ولا هاممها

يعنى جوز بنتى كان هايسافر ويخلى اختها ومصطفى يقعدوا عندنا لغاية مايظبط وضعه فى البلد اللى هايروحها
تصدقوا قلتله لا ماينفعش....لان الست الدكتوره هاتنشغل بيهم ومش هاتذاكر
ودا كله علشان ماخليش ليها حجه لعدم مذاكرتها واهيء لها الجو الهاديء للمذاكره
ولكن ولا هى هنا...ولا هان عليها تقولى :...لا ياماما هاذاكر ومتخافيش عليا
لكن اجد منها الصمت التام...والعند الزؤام

ياناس ياهو:.... حد يقولى انا صح ولا غلط
انا صح انى بكلمها لمصلحتها
ولا غلط انى اكلمها واحاول اصحيها من غفلتها
يجماعه انا بعمل اللى عليا....ولا خلاص انا معدش ليا كلام ولا ولايه عليها

انا بجد تعبت وكل ماكلمها تعاند اكتر
وبرضه لو مكلمتهاش ولا هى هنا

طيب ايه الحل بس قولولى
حد عنده بنت زى بنتى
ولا حد عنده مشكله زى مشكلتى

ياناس ياهووووووووووووووووووو
نفسى افرح بيها وتتخرج بقى.....دا شقى العمر كله

وافوض امرى الى الله ...ان الله بصير بالعباد

كل سنه وانتم طيبين

بسم الله الرحمن الرحيم

كل سنه وانتم طيبين
اخواتى الاعزاء
ان شاء الله نقابل رمضان الجاى واحنا اكثر سعاده
واحنا اكثر صداقه...واحنا اكثر حبا
بجد وحشتونى
ومصطفى بيسلم عليكم
ومامته وباباه
كلهم بخير والحمد لله
هما لسه مروحين من عندنا التهارده
بجد احلى عيد واحنا مع بعض...كان نفسى تكونوا معانا واحنا بنلعب سوى
عقبالكم كلكم ....لما يكون عندكم احفاد كدا زى العسل
بس بقى مش هاطول عليكم
بس بهنى كل حبايبى...بهنى كل اللى بيزورونىوكل اللى بزورهم
بهنى بالعيد وبهنى برجعونا لبعضنا

وربنا يجعل كل ايامنا اعياد
امين يارب
وان شاء الله ارجع لمتابعة مدونات اصدقائى الاعزاء والاستفاده من قرائتى لكم..وربما يمكن افيدكم
بس انا عامله المدونه علشان اكتب عن حياتى مع بناتى وحفيدى
وبصراحه بتكسف انى مش بتابع الحياه عموما
وانى كمان مغلقه على نفسى
بس بجد حاولت اكتب عن مايدور فى الحياه سواء سياسى او اجتماعى او ثقافى ...للاسف معرفتش
وعلشان كدا كتابتى قليله
ياريت تعزرونى وماحدش يزعل منى...لان طبيعتى الانغلاق على نفسى
لكنى هنا معاكم حاولت اخرج شويه
بس يارب ماحدش يزهق منى...ويقول واحنا مالنا وحياتها
بس والله انا بروح عندكم واقرا لكم وببقى سعيده قوى قوى وانا بقرالكل كل اللى بيجى ويكلمنى....

وبرد عليكم وانا كلى سعاده
لانى بحبكم...وارجوا ان يكون بيننا دائما محبه واخاء واخلاص
ولانى بحبكم فى الله
اتمنى ان يكون بيننا دائما لقاء